You are currently browsing the category archive for the ‘Vida kanaka’ category.

Nouméa — 17/04/2011

Ista isla —mas correutament archipielago— tien muitas luengas con grands esferencias en totz os rans: a prenuncia de as «r» estaría un buen exemplo u mismo as familias de procedencia. A sociedat kanaka yera rexita por os clans d’as tribus; istas, amugatan o suyo territorio con emblemas que yeran representatos en petroglifos. A vida se feba en as tribus. Plegon os angleses y mas tardi os franceses, prencipiaba a colonizacion.

Isto sabeba yo quan conoxié a Abo una nueit que yera en una placha de Nouméa. Abo, mesache naxito en Ouvéa (Iaïï), islas de la leyaltat y con ideyas independentistas venio ta yo cridando. El creyeba que yo yera frances (veyio que yera blanco cosa que no puet amgar-se-ne) y prencipio a chilar en a suya luenga. Yo li recenté en francés que no li compreneba y quan paró cuenta en o mio acento espanyol prencipio a charradeta en frances.

— Por que yes aqui?

— Quereba conoixer una atra cultura que estiese esferent a l’Europeya y tamien veyer ista parti d’o mundo, mismo si ye prou luent de la mia casa… Quiers fer-te una biera con yo?

La cullio y recento a suya vida. Teneba 20 anyos y li feba muito goyo a luenga espanyola. Li quacaba muito mas que la francesa porque —seguntes diciba— yera una luenga fiera trayita por os colonizadors. Os mismos que prevocon —contino a charradeta— les événements de Ouvéa (anque el encara no heba naxito). Yera la mia cumpleanyadas y li pregunte como yera la canta en a suya luenga.

—Nusatros no en tenemos una. En a nuestra cultura no cal festellar os anyos, sino os diyas. A tu he de charrar-te en frances, porque no me remero de l’espanyol y no conoixes a mia luenga. Asinas mos replecamos.

Trobo asabelo interesant que siga o francés a luenga franca en un territorio que ye a mas de 18 000 kilometros. Como se ha arribato a isto?

Francia, gran esfensor d’o centralizacion no replecaba —y encara contina sin de fer-lo— que en o suyo territorio se fablase una atra cosa que no estiese lo frances. Ye verdat que aqui lo teneba prou dificil, tant que huet pueden sentir-se en a carrera luengas kanakas y wallisinas. Manimenos, o francés ye aqui a luenga de prestixio y la prencipal en as comunicacions dentre a chent por muitas ragons:

•Historicas:

O frances, luenga de l’imperio colonial. Quan Francia adibiba un nuevo territorio a lo suyo imperio, a luenga oficial deveniba lo frances. Isto mismo ocurriba con os atros imperios d’a epoca colonial.

•Ideolochicas:

O razonamiento ideolochico frances sigue ista linia: en Francia se fabla frances asinas que si isto ye Francia cal emplegar o frances.

•Politicas:

Estau centralista, almenistracion centralizata, tot ha de pasar por Paris asinas que tot ha de estar en a luenga de istos funcionarios. En una atra dentrada ya tos metere mas exemplos de centralizacion.

•Economicas:

Os negocios en as colonias han de estar siempre con a metropoli, por ixo son colonias —autualment se lis dice dominios u territorios de ultramar. Os intercambeos economicos son con a metropoli de luenga francesa asinas que ta treballar s’amenistaba lo frances.

•Amostranza:

Sistema educativo frances —gracias a ixo soi aqui, tot cal dicir-lo— con metodolochia francesa y curriculas francesas. Luenga d’amostranza: frances. Bi-ha una asinnatura de «luenga rechional», como una luenga forana mas [ya bi-ha mas que en Aragon!] y eslexible. No fa muito tiempo prencipion a estudear a suya historia. Antis, emplegaban os mismos manuals que se trobaban por exemplo en Lyon.

•Comunicacion:

O frances autua como luenga de comunicacion dentre as tribus y dentre os nuevos colonos. Una luenga franca que totz sapen emplegar en as relacions interculturals…

Asinas que si Abo quiere charrar con bella presona de Poindimié, Bourail o Canala habra de fer uso d’ixa luenga que no li quaca ni brenca ni meya; si vienen estracheros tamien habra de fer-lo. O frances ye a luenga franca aqui, como ya estio o latin en Europa, como ye l’angles en o mundo o como estara… qui sape?

Advertisements

Nouville, Kanaky (Nouvelle-Calédonie) — 11/04/2011

Quan uno ye mayestro escubre cosetas asabelo interesants. Bi-ha vegadas qu’ixos trobos son quan a lición n’ha feito que prencipiar, os alunnos son en os suyos posientos y mirant si totz i sont.

—¿Makupua?

—Claude, ta vustet me digo Claude.

Asinas que Makupua, ta os no charrants d’as luengas inicials que bi’n-ha en ista isla ye Claude. Totas as vegadas que digas Makupua, el te risponderá «Claude». O suyo nombre ye ta la suya chent, quan ye difuera de la suya tribu totz han de dicirle o suyo nombre afrancesato. Iste zaguer nombre que no surte en os decuments oficials l’en fera servir siempre que no siga en a suya tribu, ye como si esen o nombre internacional y o nombre tribal. Manimenos, no ye la sola cultura que emplega ista internacionalización de los suyos nombres.

Remero que quan estié en Moldavia conoxié a bels chinos qui se diciban con nombres angleses… ¿Por qué? Els sapen que dengún saperá clamarlis en o suyo nombre, más que más porque ye muit dificil manullar una luenga tonal como a china asinas que se meten o suyo nombre en anglés quan son difuera de la suya tierra y a resta d’o mundo saperá como en fer-lo… quí no podrá dicir Henry? No ye masiau complicau.

Anque siga en a capital d’a isla, muitos d’os estudeants vienen de difuera y pasan as nueits en internatos d’o instituto. Bels d’els, quasi totz os kanakos d’as Islas de la Leyaltat y de lo nord, de la «selva» son bilingües con a luenga d’a suya tribu y lo francés. Muitas vegadas, os europeyos —os occidentals que millor comprenemos as atras culturas seguntes nusatros— mos xublidamos d’o que quiere dicir una cultura.

Un atro diya quan yeramos prencipiando o curso febamos exercicios de presentacions orals. Yo veyié que bi-heba una alunna que yera muit buena y sabeba muito más d’o que yera dicindo pero yera tamién asabelo niervuda y por ixo no fació muit bien l’exercicio. Yo li recenté que antes fablar devant d’a chent y ta que os niervols s’en vaigan prou luen un buen exercicio que foi yo ye prauticar devant d’un espiello.

ah, non, non monsieur, no cal fer ixo.

Ella diciba que no caleba mirar-se-ne os espiellos porque istos pillaban l’esprito d’a presona que se yera mirant y ya no les deixaban i surtir. Qué rispondes a ixo ? Qué puedes dicir-le ? «Ah! no sabeba cosa». Muitas vegadas son os alunnos os que m’amostran a yo y cal dicirles gracias por fer ixo.

Nouville — Kanaky (Nouvelle-Calédonie)                     22/03/2011

A historia d’ista isla no ye atra qu’una historia de colonización y racismo. En a epoca d’os grands trobos europeyos en o mundo, arriboron os angleses con James Cook —de feito l’avenida prencipal de Nouville leva o suyo nombre—. Marchoron os angleses, deixaron as malotías traitas dende Europa y arriboron os franceses.

Els s’apropioron d’ista tierra y metioron o sinyal francés (o que se feba en a epoca). Prencipió como isla-garchola, os franceses creyeban que a millor traza de rematar con o problemas yera nimbiar-los bien luent. Qué pasaba con os reyos que plegaban a suya condena ? En muitas vegadas, Francia no lis deixaba tornar, teneban ixe dreito privato. Manimenos, lis daban tierras.

Dovinatz de quí yeran ixas tierras ? Efeutivament, d’os kanakos como lis diciban os franceses ; os europeyos blancos preneban a tierra y a chent d’as tribus que y viviban habioron de marchar án lis diciban. Y ixo pues ? No yeran blancos, no yeran franceses, no teneban dengún dreito. No fa muito, bi-habió bella cosa parexita a una guerra cevil, clamada «les événements» y dimpués d’ixo prencipioron os achustos («accords Nouméa»).

Si no bi’n-ha de problemas, os kanakos, franceses, caledonians, wallisins, vietnamitas que viven aquí han de votar en 2014 un referendum d’independencia lo suyo esvenider. Encara no puedo prexinar os resultaus, pero siga o que siga estarán muit dificils.

L’altro’l diya, quan tornaba ta la mía cambra un mesache qui se clamaba Ken seguntes me dició, prencipió a fer-me bellas qüestions. D’án yes ? Yes mayestro ? Treballas en o liceo ? Una vegada que l’heba rispondito prencipió a charradeta. Ken ye en BTS (alto u baixo como una FP) d’incheniería, entimás d’ixo ya tien o suyo grau en Ciencias Politicas. Li recenté que yo soi muit interesato en as ciencias politicas y li demané án l’heba estudiato. « En París » —Capital d’a metropoli, me dicié ta yo— pero entimás adubió qu’heba feito politicas porque o suyo país estará independient en 2014 y s’amenistarán muitos politicos. Allí i dentrará Ken.

Remeré como en os procesos historicos de ex-colonización os liders siempre s’heban educato en a metropoli y s’i heban trayito as suyas ideyas. Yo también facié os míos estudeos en a capital d’Aragón de primeras, y en a d’Espanya dimpués. Sin dembargo, no cregio que siga un lider independentista como quiere estar Ken. Quí sape o que pasará en iste país ? Caldrá asperar.

Fa no muito tiempo leyié en El Imperio de Kapuscinski que os colonizadors u fillos de colonizadors tornan por sentiments de culpabilidat quan a colonia devient independient. Será isto como una nueva Archelia ? Estoi que no. De totas trazas, bi-ha chent con interpresas que ya son pensant en qué fer en atros territorios dimpués d’o 2014 au cas où. Yo tiengo as mías dubdas sobre os resultaus d’o referendum.

De primeras porque senguntes os achustos de Nouméa se ye caminant enta una soberanía compartita. Lo gubierno ye prenent competencias que Francia ya no nunca tiendrá pero bi-ha aspeutos con os que Kanaky no puet fer cosa. No puet pagar os chornals d’os mayestros que ye donant Francia, por eixemplo (uno d’os problemas d’os prés d’aquí ye por ixo) y no bi-ha muitos locals que quieran fer istos treballos por menos d’o qu’en tienent en a Metropoli… Prexinant muito puedo plegar ta la ideya de que Francia podiese donar una compensación, pero ixo no estará ta cutio. Y dimpués d’ixo ? Estaría como muitas atras ex-colonias d’Africa ? Veyeremos, o tiempo ye l’unico que l’en sape.

Quereba que ista dentrada surtiese o diya 10 de marzo, diya que plegué ta Nueva Caledonia. Manimenos, bi-habió bels problemas con l’internet en ista isla y dica huet no podié configurar lo WordPress ta la conexión que tiengo aquí. Asinas que, de primeras, cal dicirle a Firefox 4, gracias. Poquer a poquer iré metiendo historietas y opinions sobre a vida aquí.

07/03/2011                         Zaragoza

A la fin plegó lo diya. Yera asperando dende chunio quan sabié que me heban otorgato a beca. Plegó lo diya a la fin y… caleba dicir «que tos vaiga bueno, mos veyeremos en nadal si tiengo suarde». Y… sí, la mía mai ploró. No heba veyiu as suyas glarimas muitas vegadas y, de seguras, nunca no ploró antis d’os míos viaches; ixo ha d’estar porque sape que isto no ye un viache normal y porque estaré muit luen quan ameniste d’estar con yo. Mai tamién sape que prencipia a mia vida profesional: ya quedó en a zaga os diyas de l’universidat, diyas en os que tornaba a sobén ta Anzanigo, diyas en os podía pillar un AVE y aparixer en la suya cumpleanyadas anque estiese con os desamens; ista vida me ha levato ta Moldavia (án aspero tornar bel diya) y agora aquí.

A mai le dicié que habría de tornar en nadal, que no caleba plorar. Surtiba de casa y marchaba ta la gara. Puyaba ta lo tren que me menaba ta Madrit y de ahí habrían de pasar 35 horas de viache dica Nueva Caledonia. Quan a la fin meteba un pied aquí no sabeba ya án yera, qué hora yera. En a mía capeza sentiba mientres feba una gambadeta por o centro de Nouméa «ya yes plegato, agora en un ratet a durmir y quan te rebelles ya veyeremos o que femos».

Yo siempre dicié que o facil ye no fer cambeos en a tuya vida, prebar de continar en o tuyo lugar. Marchar nunca no me pareixió o camín más simple. Ye verdat que ista ye a vida que he esleyiu. Podría haber estau en Aragón fendo… ¿cosa? Puet estar bella traducción de cabo ta quán, una correución con suarde, una churada si ixo. Y tanimientres? Cambrero en Anzanigo, teleoperata en Madrit.

No sé muit bien qué rispuesta dar quan me dicen: «qué suarde tiens!» «cómo me fería goyo a yo marchar tamién» «vives de puta mai». Tiengo suarde de que me den as becas, a verdat pero no ye tan facil. Quan marchas deixas a la tuya familia, ista vegada ta nueu meses, albandonas a los tuyos amigos, si tiens moza… a veyer si encara contina con tú quan tornes. Os comentarios, entimás, continan: «vas a conoixer a muita chent, feras muitos colegas…». Chent que conoixes en tres meses y a veyer quan tornas a charrar con els, colegas que dimpués de nueu meses me feré unas bieras con els si vienen ta Europa. Tamién ye verdat que son as mismas preguntas quan tornas y ye allora quan sapes que yes en casa. Ya tos recentaré o tema de as preguntas atro diya.

Una gran acarrazada dende Kanaky (Nueva Caledonia).

Advertisements